Герб Берасьця

Герб Бе́расьця — адзін з афіцыйных сымбаляў места Берасьце.

Герб Берасьця лац. Hierb Bieraścia
Апісаньне
Зацьверджаны	26 студзеня 1991
Ранейшы выгляд	(1845 год)
Герб Берасьця ў Вікісховішчы

Права на атрыманьне гербу Берасьцю было даравана вялікім князем Аляксандрам прывілеем 1494 году: «у блакітным полі срэбраны лук са стралой накіраванай уверх».

Гісторыя

Згодна з прывілеем вялікага князя Жыгімонта ІІІ 1554 году, Берасьце атрымала права карыстацца гербавай пячаткай з выявай чатырохвугольнай вежы на чырвоным полі на зьліцьці дзьвюх рэк (Буга і Мухаўца). Гэты герб зафіксаваны на пячатцы войтаўска-лаўніцкай калегіі гарадзкога магістрата. Акрамя гэтага Берасьце мела іншую пячатку з 1584 году, пра якую ўзгадвае ў сваім зборніку гербаў Барташ Папроцкі:

Берасьце ўжывае лук з нацягнутай цецівой з накладзенай стралой і з тэкстам вакол: Sigillum civitat Brestensis Magni Duc Litvaniae.

У 1742–1775 гады гербам Берасьця зьяўляўся фігурны картуш, на якім выяўлены лук з нацягнутай цецівой з накіраванай уверх стралой. Над картушам — карона. Пасьля акупацыі гораду войскамі Расейскай імпэрыі ў 1795 годзе Берасьце стала павятовым горадам Гарадзенскай губэрні, і стары герб быў скасаваны. Новы герб Берасьця быў зацьверджаны расейскімі ўладамі 6 красавіка 1845 году разам зь іншымі гарадамі Гарадзенскай губэрні. Гэты варыянт герба быў утвораны на аснове герба 1554 году. Новы герб меў наступнае апісаньне:

У верхняй частцы шчыта Гарадзенскі герб; у ніжняй, у блакітным полі прадстаўлена зьліцьцё рэк Буг і Мухавец; на мысе, утвораным злучэньнем рэк, пастаўлена кола срэбраных шчытоў, сярод якіх узвышаецца крапасны штандар з двухгаловым арлом, у гонар таго, што Берасьце ўтворана ў крэпасьць.

У канцы ХІХ стагодзьдзя быў створаны праект новага гербу Брэст-Літоўска: «у лазуровым шчыце апракінуты вілападобны срэбраны крыж», аднак ён ня быў зацьверджаны афіцыйна.

Герб Берасьця з 1921 да 1939 г.г.

У пэрыяд знаходжаньня Берасьця ў складзе Польшчы (з 1921 да 1939 г.г.) у якасьці герба гораду выкарыстоўвалася выява, на якой быў намаляваны астрог з трыма малымі вежамі. Аднак польскія гарадзкія ўлады пагаджаліся, што гэты герб ніяк ня быў зьвязаны з гісторыяй гораду, і разглядалі некалькі іншых варыянтаў гербу. Аднак пачатак Другой Сусьветнай вайны й далучэньне Берасьця да Савецкай Беларусі спынілі гэтую дзейнасьць.

Сучаснасьць

Сучасны герб Берасьця

Сучасны герб гораду быў зацьверджаны рашэньнем Берасьцейскага гарадзкога Савета народных дэпутатаў 26 студзеня 1991 году:

На блакітным полі выяўлены срэбраны лук з нацягнутай цецівой і страла, накіраваная ўверх.

Зарэгістраваны ў Гербавым матрыкуле Рэспублікі Беларусь 1 чэрвеня 1994 г. № 1. Герб Берасьця адносіцца да гісторыка-геральдычных помнікаў Беларусі.