Плантагенэты

Плантагенэты (па-ангельску: Plantagenets) — каралеўская дынастыя францускага паходжаньня, адна з адгалінаваньняў дома Гатынэ-Анжу, асноўныя ўладаньні якой (графства Анжу) першапачаткова знаходзіліся ў Францыі, але ў наступстве значна пашырыліся. У выніку Плантагенэты аказаліся кіраўнікамі Англіі (1154—1485), Нармандыі (1144—1204, 1346—1360 і 1415—1450), а таксама Гасконі і Гіені (1153—1453). Аднак у хадзе канфліктаў з францускімі каралямі Плантагенэты былі вымушаныя саступіць само графства Анжу Францыі ў 1206 г.

Імя «Плантагенэт» паходзіць ад жаўтазелю (planta genista), кветкі, якая была эмблемай Жофруа V, графа Анжуйскага. Дзякуючы ўдаламу шлюбу з Матыльдай, дачкой Генрыха I, караля Ангельшчыны, Жофруа атрымаў шанец успадкаваць ангельскую карону. Сын Жофруа і Матыльды Генрых II стаў першым каралём Ангельшчыны (1154—1189) і родапачынальнікам дынастыі.

Апошнім каралём у прамой лініі быў Рычард II. Ланкастэры і Ёркі, якія ўладарылі пасьля яго, былі прадстаўнікамі бакавых адгалінаваньняў дома Плантагенэтаў, якія ішлі ад малодшых сыноў караля Эдўарда III.

Вядомыя прадстаўнікі роду

Каралі Ангельшчыны

Генрых II (1154—1189)
Рычард I Львінае Сэрца (1189—1199), сын папярэдняга
Ян Безьзямельны (1199—1216), брат папярэдняга
Генрых III (1216—1272), сын папярэдняга
Эдўард I (1272—1307), сын папярэдняга
Эдўард II (1307—1327), сын папярэдняга
Эдўард III (1327—1377), сын папярэдняга
Рычард II (1377—1399), унук папярэдняга, сын Эдўарда Чорнага прынца

Вонкавыя спасылкі

Плантагенэты — сховішча мультымэдыйных матэрыялаў