Маршал Ван Олстайн

Маршал Ван Олстайн (па-ангельску: Marshall Van Alstyne), нарадзіўся ў Калюмбусе, штат Агаё — прафэсар Бостанскага Ўнівэрсытэту (па-ангельску: Boston University) й дасьледнік у Масачусэцкім Інстытуце Тэхналёгій (па-ангельску: Massachusetts Institute of Technology). Спэцыялізуецца на эканоміцы інфармацыі.

Ван Олстайн вырас у Паўночнай Караліне (ЗША), ступень бакаляўра атрымаў у Ельскім Унівэрсытэце (па-ангельску: Yale University), магістра й PhD у галіне інфармацыйных сыстэмаў — у Масачусэцкім Інстытуце Тэхналёгій.

Зрабіў істотны ўнёсак у вывучэньне рынкаў інфармацыі. Разам з сваімі студэнтамі Тэдам Лоўдэрам ды Рыкам Ўошам першым давёў, што ўжываньне прынцыпу інфармацыйнае асымэтрыі да апрацоўкі спаму тэарэтычна можа быць болей карысным для спажыўца, чым дасканалы фільтар (гл. таксама «эканоміку ўвагі»). Разам з прафэсарам Джэфры Паркерам правёў грунтоўныя дасьледаваньні фэномэну «двухбаковых сетак», праяве аднаго зь сеткавых эфэктаў, дзе патлумачыў, якім чынам кампаніі могуць аддаваць інфармацыю задарма (прадаваць па нулявым кошце) і пры гэтым заставацца ў выйгрышы. Субсыдаванае цэнаўтварэньне ды эфэкт дзьвюхбаковых сетак могуць спрычыніцца да алігапалізацыі рынку, або падзелу яго між малой колькасьцю гульцоў. Зараз гэты эфэкт бярэцца да ўвагі фірмамі — пры распрацоўцы карпаратыўных стратэгіяў, ды антыманапольнымі ўправамі — пры прапрацоўцы адпаведнага заканадаўства.

Сумесна з Эрыка Брынёлфсанам у эсэ «Сеціўныя суполкі: глябальнае паселішча ці віртуальныя Балканы?» апісаў працэс уплыву сыцыяльных мэдыяў на падзел людзей у інтэрнэце паводле розных прыкметаў.

Ляўрэат некалькіх узнагародаў за навуковыя працы, у тым ліку ўзнагароды Нацыянальнае Навуковае Фундацыі ЗША. Публікуецца ў такіх часопісах, як Science, Management Science ды Harvard Business Review.

Вонкавыя спасылкі

• Хатняя старонка Ван Олстайна (анг.)
• Артыкулы (анг.)