Дзяржаўны камітэт па навуцы і тэхналёгіях Рэспублікі Беларусь

Дзяржаўны камітэт па навуцы і тэхналёгіях Рэспублікі Беларусь (ДКНТ Беларусі) — ведамства ўраду Беларусі, упаўнаважанае парадкаваць ахову правоў інтэлектуальнай уласнасьці. Старшыня камітэту прызначаецца й здымаецца з пасады прэзыдэнтам. З 21 снежня 2021 году пасаду старшыні камітэту займае Сяргей Шлычкоў.

Дзяржаўны камітэт па навуцы і тэхналёгіях Рэспублікі Беларусь
Абрэвіятура	ДКНТ РБ
Дата ўтварэньня	30 лістапада 1993 (30 гадоў таму)
Тып	ведамства
Юрыдычны статус	дзяржаўная ўстанова
Мэта	разьвіцьцё навукі і ахова інтэлектуальнай уласнасьці
Штаб-кватэра	Першамайскі раён, вул. Акадэмічная, д. 1
Месцазнаходжаньне	Менск
Афіцыйныя мовы	беларуская, расейская
Старшыня	Сяргей Шлычкоў
Кіроўны орган	Калегія
Зьвязаныя кампаніі	«Навукова-аналітычны цэнтар інфармацыі, інавацыяў і трансфэра тэхналёгіяў» (Магілёў)
Бюджэт	31 845 млн рублёў (2010 год; 10 637 тыс. $)
Сайт	gknt.gov.by/be
Колішняя назва	Камітэт па навуцы і тэхналёгіях (да 23 верасьня 1994 г., 5 сакавіка 2002 — 12 лютага 2004), Камітэт па навуцы (24 верасьня 2001 — 5 сакавіка 2002)

Будова

На 2019 год ДКНТ Беларусі ўлучаў:

• 3 кіраўніцтвы — 1) інавацыйнай палітыкі, 2) навукова-тэхнічнай палітыкі і экспэртызы, 3) міжнароднай навукова-тэхнічнай палітыкі і экспэртызы;
• 3 аддзелы — 1) інфармацыйна-аналітычны, 2) плянаваньня, эканомікі і фінансаў, 3) прававой і кадравай працы;
• 2 групы — 1) арганізацыйнай працы і кантролю, 2) бухгальтарскага ўліку і фінансаў;
• падразьдзяленьне аховы дзяржаўных таямніцаў;
• 3 дзяржаўныя ўстановы — Беларускі інстытут сыстэмнага аналізу і інфармацыйнага забесьпячэньня навукова-тэхнічнай сфэры, Нацыянальны цэнтар інтэлектуальнай уласнасьці і Рэспубліканская навукова-тэхнічная бібліятэка;
• Беларускі інавацыйны фонд;
• 3 унітарныя прадпрыемствы — «Гарадзенскі цэнтар навукова-тэхнічнай і дзелавой інфармацыі», «Цэнтар навукова-тэхнічнай і дзелавой інфармацыі» (Гомель), «Навукова-аналітычны цэнтар інфармацыі, інавацыяў і трансфэру тэхналёгіяў» (Магілёў).

Паўнамоцтвы

Паводле ўставы камітэт мае паўнамоцтвы на:

• прапанову зьменаў ды нагляд за выкананьнем заканадаўства аб навуцы, інавацыях ды ахове правоў інтэлектуальнай уласнасьці;
• спыненьне выдаткоўваньня на інавацыйную дзейнасьць з дзяржаўнага каштарысу;
• стварэньне навуковых радаў;
• замову навуковых досьледаў;
• запыт зьвестак ва ўстановах;
• заключэньне міжведамасных міжнародных пагадненьняў аб ахове правоў інтэлектуальнай уласнасьці;
• правядзеньне навуковых нарадаў ды выставаў;
• стварэньне, ператварэньне й касаваньне падпарадкаваных установаў;
• прыцягненьне адмыслоўцаў да навуковых досьледаў ды аховы правоў інтэлектуальнай уласнасьці;
• заключэньне з навуковымі ўстановамі ды адмыслоўцамі дамоваў на выкананьне навуковых досьледаў;
• хадайніцтва аб узнагародзе работнікаў за дасягненьні ў навуцы ды ахове інтэлектуальнай уласнасьці.

Мінуўшчына

30 лістапада 1993 году Кабінэт міністраў Рэспублікі Беларусь зацьвердзіў Пастанову № 809 аб стварэньні Камітэту па навуцы і тэхналёгіяў (КНТ). 23 верасьня 1994 году прэзыдэнт Беларусі Аляксандар Лукашэнка падпісаў Указ № 122 «Аб зьмяненьні структуры цэнтральных органаў кіраваньня Рэспублікі Беларусь», паводле якога КНТ далучылі да Міністэрства адукацыі і навукі Рэспублікі Беларусь. 11 студзеня 1997 году А. Лукашэнка падпісаў Указ № 30 «Аб сыстэме рэспубліканскіх органаў дзяржаўнага кіраваньня, падпарадкаваных Ураду Рэспублікі Беларусь», якім пераўтварыў КНТ Мінадукацыі і навукі Беларусі ў Дзяржаўны камітэт па навуцы і тэхналёгіях Рэспублікі Беларусь (ДКНТ Беларусі). 24 верасьня 2001 году Ўказам № 516 «Аб удасканаленьні сыстэмы рэспубліканскіх органаў дзяржаўнага кіраваньня і іншых дзяржаўных арганізацыяў, падпарадкаваных Ураду Рэспублікі Беларусь» ДКНТ Беларусі аб’ядналі зь Дзяржаўным найвышэйшым атэстацыйным камітэце і Дзяржаўным патэнтным камітэтам у Камітэт па навуцы пры Савеце міністраў Беларусі. У складзе Камітэту па навуцы ўтварылі Найвышэйшы атэстацыйны камітэт. 5 сакавіка 2002 году А. Лукашэнка падпісаў Дэкрэт № 7 «Аб удасканаленьні дзяржаўнага кіраваньня ў сфэры навукі», якім Камітэт па навуцы зноў перайменавалі ў КНТ пры Савеце міністраў. У склад КНТ улучылі Нацыянальны цэнтар інтэлектуальнай уласнасьці. 12 лютага 2004 году А. Лукашэнка падпісаў Указ № 66 «Аб некаторых захадах па аптымізацыі сыстэмы рэспубліканскіх органаў дзяржаўнага кіраваньня і іншых дзяржаўных арганізацыяў, падпарадкаваных Савету міністраў Рэспублікі Беларусь, структуры і колькасьці работнікаў дзяржаўных органаў, іншых дзяржаўных арганізацыяў». Паводле Ўказу, КНТ зноў пераўтварылі ў ДКНТ Беларусі. 4 жніўня 2009 году А. Лукашэнка падпісаў Дэкрэт № 9 «Аб унясеньні зьмяненьняў і дапаўненьняў у Дэкрэт прэзыдэнта Рэспублікі Беларусь ад 5 сакавіка 2002 г. № 7», паводле якога разьмежаваў паўнамоцвы ДКНТ Беларусі і Нацыянальнай акадэміі навук Беларусі.

Вонкавыя спасылкі

• Кантакты // Дзяржаўны камітэт па навуцы і тэхналёгіях Рэспублікі Беларусь, 2019 г. Праверана 10 чэрвеня 2019 г.
  • Звароты