Krakout

Krakout (з анг. — «Крэка́ўт») — кампутарная гульня, створаная і выдадзеная ў 1987 року брытанскай кампаніяй «Gremlin Graphics» для хатніх кампутараў ZX Spectrum, Amstrad CPC, BBC Micro, Commodore 64 і MSX.

Krakout
Загрузачны экран вэрсіі для ZX Spectrum Загрузачны экран вэрсіі для ZX Spectrum
Дата выпуску	1987
Жанр	ламаніна
Стваральнікі
Распрацоўнік	Gremlin Graphics
Выдавец	Gremlin Graphics
Праграмісты	Эндзі Грын, Боб Тун, Грэг Голмс
Мастакі	Тэры Лойд, Стыў Керы
Кампазытар	Бэн Дагліш
Тэхнічныя дэталі
Плятформы	Amstrad CPC, BBC Micro, Commodore 64, MSX, ZX Spectrum
Рэжым	адзінаасобная гульня
Носьбіты	касэта, дыскета
Кіраваньне	клявіятура, джойстык

Гульнявы працэс

Гульня Krakout ёсьць чарговай клянаванай вэрсіяй відэагульні Breakout 1976 року. Аноўная адметнасьць Krakout у тым, што ракетка разьмешчаная ня зьнізу, а зьлева або справа (на выбар гульца). Адпаведна на кульку ня ўзьдзейнічаюць сілы гравітацыі, яна рухаецца проста па інэрцыі. У мэню опцыяў можна абраць і ўсталяваць хуткасьць руху кулькі.

Гульцу прапанавана пераадолець сто розных узроўняў гульні, разьбіваючы кулькай рознакаляровыя цаглінкі. На ўзроўнях будуць трапляцца ўсемагчымыя «прыхадні», якія будуць усялякім чынам замінаць праходжаньню. Некаторыя цаглінкі разьбіваюцца ня зь першага разу, некаторыя немагчыма разьбіць увогуле. Існуе цэлы шэраг карысных бонусаў. Каб скарыстацца імі, неабходна трапіць кулькай у цаглінку зь літарай.

Успрыняцьце

Гульня атрымала зьмяшаныя ацэнкі: папулярны часопіс CRASH раскрытыкаваў Krakout за адсутнасьць суправаджальнай музыкі і даволі высокую складанасьць, паставіўшы адзнаку 46 %. Іншы часопіс, Computer Gamer, выставіў гульні 85 балаў са 100.

Працягі

У 2003 року беларуская кампанія «WE Group» выпусьціла рымэйк гульні Krakout для IBM-сумяшчальных пэрсанальных кампутараў.

У 2012 року выйшаў рымэйк гульні Krakout для мабільных прыстрояў пад кіраваньнем Android — Krakoid. У гульні выкарыстаны фізычны рухавічок «Box2D».

Вонкавыя спасылкі

• Krakout  (анг.) на World of Spectrum
• Krakout  (анг.) на MobyGames