Afrikaans: Die Zambezidelta dreineer 'n opvangsgebied wat oor agt lande heen strek en bykans 1,6 miljoen vierkante kilometer (600 000 vierkante myl) beslaan. Die Zambezi is die vierde grootste rivier in Afrika, en die grootste oostelikvloeiende waterweg. Van die oorsprong in Zambië vloei dit oor 2 574 kilometer (1 599 myl) van die suid-sentraal-Afrikaanse plato voordat die water en sediment in Mosambiek via 'n groot delta in die Indiese Oseaan gegiet word.

Die Operasionele Landafbeelder aanboord die Landsat 8-satelliet het op 29 Augustus 2013 hierdie beeld van die Zambezidelta in natuurlike kleur verkry. Sandbanke en -versperrings strek oor die monding van die delta heen, en sediment in suspensie word tien kilometer ver die see ingevoer. Die kuswaters kry weens hierdie sanderige uitvloei 'n melkerige blougroen kleur, in teenstelling met die Indiese Oseaan se diepwaters wat 'n donkerblou is.

Die Zambezidelta se kuslyn vorm 'n 230 km-lange front, en die binnelandse vloedvlakte bestaan uit 18 000 vierkante kilometer van moerasse, grasveld en selfs savanne. Die gebied is lank reeds gesog onder bestaansvissers en -boere wat vrugbare grond soek vir gewasse soos suiker, en waters waarin garnale en vis gedy. Buffels, kraanvoëls en ander wildlewe vind ook in hierdie internasionaal erkende vleiland 'n toevlugsoord.