«Усхо́д-6» — шосты й апошні пілятаваны касьмічны карабель з сэрыі «Усход». Першы ў сьвеце касьмічны карабель, пілятаваны жанчынай.

Апісаньне палёту рэдагаваць

Адначасова з «Усходам-6» у космасе знаходзіўся касьмічны карабель «Усход-5», які пілятаваў касманаўт Валер Быкоўскі. У гэтым сумесным вылеце вырашаліся задачы мэдыцынскага, тэхнічнага й палітычнага характару. Вывучаўся ўплыў касьмічнага палёту на арганізмы мужчыны й жанчыны, у прыватнасьці, у гэтым палёце была канчаткова вырашаная праблема харчаваньня касманаўтаў. Касманаўты мелі чатырохразовае харчаваньне, якое складаецца з розных натуральных прадуктаў, і стала ясна, што касманаўт можа нармалёва харчавацца самай рознай зямною ежаю.

Адмыслова для палёту Церашковай была распрацаваная канструкцыя скафандра, прыстасаваная для жаночага арганізму, некаторыя элемэнты карабля таксама былі зьмененыя пад магчымасьці жанчыны.

Больш за ўсё часу занялі экспэрымэнты па радыёсувязі. Касманаўты выходзілі на сувязь зь Зямлёю на кароткіх і ультракароткіх хвалях, а таксама вёўся радыёабмен непасрэдна паміж караблямі, каардынуючы свае дзеяньні й параўноўваючы вынікі назіраньняў.

Гэты палёт таксама выкарыстоўваўся для прапаганды дасягненьняў сацыялізму. Па-першае, дэманстравалася, што жанчыны маюць у СССР тыя ж магчымасьці, што й мужчыны, а па-другое, палёт даказваў надзейнасьць савецкай касьмічнай тэхнікі, што павінна было сымбалізаваць надзейнасьць усяго савецкага ладу.

Экіпаж рэдагаваць