Дзяржаўная Трацьцякоўская галерэя
Дзяржа́ўная Трацьцяко́ўская галерэ́я, ДТГ — мастацкі музэй у Маскве, заснаваны ў 1856 годзе купцом Паўлам Трацьцяковым, які меў адну з найбуйнейшых у сьвеце калекцыяў расейскага выяўленчага мастацтва. Экспазыцыя ў інжынэрным корпусе «Расейскі жывапіс XI — пачатку XX ст» (Лаўрушынскі завулак, д. 10) зьяўляецца часткай Усерасейскага музэйнага аб’яднаньня «Дзяржаўная Трацьцякоўская галерэя», заснаванага ў 1986 годзе.
Гісторыя
рэдагавацьПавал Трацьцякоў пачаў зьбіраць сваю калекцыю жывапісу ў сярэдзіне 1850-х. Гэта празь некаторы час прывяло да таго, што ў 1867 г. для шырокай публікі ў Замаскварэччы была адкрыта «Маскоўская гарадзкая галерэя Паўла і Сяргея Трацьцякова». Яе калекцыя налічвала 1276 карцін, 471 малюнак і 10 скульптур расейскіх мастакоў, а таксама 84 карціны замежных майстроў.
У жніўні 1892 Павал Міхайлавіч перадаў сваю мастацкую галерэю ў дар гораду Маскве. У зборы да гэтага часу налічвалася 1287 жывапісных і 518 графічных твораў расейскай школы, 75 карцін і 8 малюнкаў эўрапейскай школы, 15 скульптур і калекцыя абразоў. 15 жніўня 1893 адбылося афіцыйнае адкрыцьцё музэю пад назвай «Маскоўская гарадзкая галерэя Паўла і Сяргея Міхайлавіча Трацьцякова».
Літаратура
рэдагаваць- Беларуская энцыклапедыя: У 18 т.. — Мн.: 2002 Т. 15: Следавікі — Трыо. — С. 524.