Мікола Грынчык

Мікола Грынчык (1 жніўня 1923, в. Быцень, Івацэвіцкі раён — 1999) — беларускі літаратуразнавец. Доктар філялягічных навук. Прафэсар. Заслужаны дзеяч навукі Беларускай ССР (1977).

Мікола Грынчык
Дата нараджэньня	1 жніўня 1923(1923-08-01)
Месца нараджэньня	Быцень, Слонімскі павет, Наваградзкае ваяводзтва, Польская Рэспубліка
Дата сьмерці	12 кастрычніка 1999(1999-10-12) (76 гадоў)
Месца сьмерці	Менск, Беларусь
Месца вучобы	Гарадзенскі дзяржаўны ўнівэрсытэт імя Янкі Купалы
Занятак	літаратурны крытык, літаратуразнаўца, фальклярыст, навуковец
Месца працы	Інстытут літаратуры імя Янкі Купалы Гомельскі дзяржаўны ўнівэрсытэт Беларускі дзяржаўны ўнівэрсытэт культуры і мастацтваў
Навуковая ступень	доктар філялягічных навук (1970)
Узнагароды

Жыцьцяпіс

Нарадзіўся ў сялянскай сям’і. З сакавіка 1943 году — агентурны разьведчык партызанскага атраду «Савецкая Беларусь» Берасьцейскага злучэньня, зь ліпеня 1944 году — у Савецкай Арміі, на фронце. Быў цяжка паранены.

Пасьля вайны працаваў загадчыкам Быценьскага раённага аддзела сацыяльнага забесьпячэньня. У 1952 годзе скончыў літаратурны факультэт Гарадзенскага пэдагагічнага інстытуту. Настаўнічаў на Гарадзеншчыне.

Скончыў асьпірантуру пры Інстытуце літаратуры імя Янкі Купалы АН БССР (1957), затым — навуковы супрацоўнік гэтага інстытуту. З 1970 годзе — загадчык катэдры беларускай літаратуры Гомельскага дзяржаўнага ўнівэсытэту. Адначасова ў 1973-1985 гг. — галоўны рэдактар рэспубліканскага навуковага міжведамаснага зборніка «Беларуская літаратура». З 1980 году — загадчык катэдры літаратуры Менскага інстытуту культуры.

Навуковая дзейнасьць

Выступаў як крытык і літаратуразнавец з 1957 году. Аўтар манаграфій «Максім Багдановіч і народная паэзія» (1963), «Фальклёрныя традыцыі ў беларускай дакастрачніцкай паэзіі» (1969), «Шляхі беларускага вершаскладаньня» (1973), крытыка-біяграфічнага нарыса «Аркадзь Куляшоў» (1964), адзін з аўтараў «Гісторыі беларускай савецкай літаратуры» (1966), «Гісторыі беларускай дакастрычніцкай літаратуры» (1969), «Истории белорусской дооктябрьской литературы» (1977), падручнікаў для студэнтаў філфака педінстытутаў «Гісторыя беларускай савецкай літаратуры. 1917-1940» (1981), «Гісторыя беларускай літаратуры. XIX - пачатак XX ст.» (1981) і «Гісторыя беларускай літаратуры. Старажытны пэрыяд» (1985).

Узнагароды

Узнагароджаны ордэнам Айчыннай вайны I ступені.