Музэй старажытнабеларускай культуры
Музэй старажытнабеларускай культуры — музэй у Менску (Беларусь).
| Музэй старажытнабеларускай культуры | |
 Фрагмэнт экспазыцыі музэю | |
| Філія | Інстытут мастацтвазнаўства, этнаграфіі і фальклёру |
|---|---|
| Месцазнаходжаньне | Менск, Беларусь |
| Адрас | вул. Сурганава, д. 1 к. 2 |
| Велічыня калекцыі | 30 000 адзінак |
| Плошча экспазыцыі | 600 м² |
| Створаны | 7 ліпеня 1977 г. |
| Адкрыты | 15 траўня 1979 г. |
| nasb.gov.by/bel/organiza… | |
Мінуўшчына
рэдагавацьЗаснаваны ў 1977 року на базе Інстытуту мастацтвазнаўства, этнаграфіі і фальклёру Акадэміі навук БССР як цэнтар вывучэньня і прапаганды беларускай мастацкай спадчыны. Адкрыцьцё, прымеркаванае да сьвяткаваньня 50-рочча Нацыянальнай акадэміі навук Беларусі, адбылося ў траўні 1979 року.
Апісаньне
рэдагавацьАгульная плошча музэю 1200 м², плошча экспазыцыі — 600 м².
Аснову калекцыі музэю склалі экспанаты, сабраныя цягам шматлікіх гадоў супрацоўнікамі Інстытуту мастацтвазнаўства, этнаграфіі і фальклёру імя Кандрата Крапівы (ІМЭФ) падчас мастацтвазнаўчых ды этнаграфічных экспэдыцыяў па тэрыторыі ўсёй Беларусі. Усе без вынятку экспанаты музэю – арыгінальныя.
Галоўнай мэтай музэю ёсьць фармаваньне экспэрымэнтальнай базы для далейшага разьвіцьця розных галінаў гістарычнай навукі — гісторыі мастацтваў, рамёстваў, этнаграфіі, эстэтыкі. Калекцыі музэю апавядаюць пра асноўныя вехі гістарычнага разьвіцьця беларускай культуры і мастацтва, пра найбольш значныя помнікі ад каменнага веку да канца XX стагодзьдзя.
Музэй разьмешчаны ў трох залях. Першая заля ўяўляе археалягічную калекцыю з раскопак старажытных стаянак і паселішчаў людзей каменнага, бронзавага і жалезнага вякоў. Другая заля — сакральнага кірунку. У ёй разьмешчаныя абразы, званы, прадстаўленая скульптура і дэкаратыўная разьба з касьцёлаў і цэркваў. Тут жа можна ўбачыць калекцыю мастацкіх тканінаў, датаваных XVII—XIX стагодзьдзямі. У трэцяй залі музэю, прысьвечанай народнай творчасьці й этнаграфіі Беларусі, прадстаўленыя традыцыйныя строі, ручнікі, абрусы, паясы, маляваныя дываны, музычныя інструмэнты, посуд з дрэва, керамікі, - прадметы, якія апавядаюць пра рамёствы і промыслы беларусаў[1].
Крыніцы
рэдагаваць- ^ Тарасевич, Ксения (23 чэрвеня 2015) Музей древнебелорусской культуры (рас.) Музеи Беларуси Праверана 10 чэрвеня 2021 г.
Литература
рэдагаваць- Шматаў В. Ф., Ярашэвіч А. А. Музе́й старажытнабелару́скай культу́ры // Беларуская энцыклапедыя: У 18 т.. — Мн.: 2000 Т. 11: Мугір — Паліклініка. — С. 13.