Сяржант Макензі

«Сяржант Макензі» (па-англа-шатляндзку: Sgt. Mckenzie) — жалобная песьня Джозэфа Макензі ў гонар прадзеда Чарлза, які служыў у званьні сяржанта ў падразьдзяленьні сіфорцкіх горцаў брытанскага войска падчас Першае сусьветнае вайны.

Песьня выйшла ў 2000 годзе ў складзе альбому «Спраўджаны й праўдзівы» (па-ангельску: «Tried and True») шатляндзкага гурта «Дзеці бубна» (па-англа-шатляндзку: Clann An Drumma). У 2002 годзе амэрыканскі рэжысэр Рэндал Воліс зладзіў у Лёндане перазапіс гуртом песьні ў суправаджэньні аркестра з 80 чалавек ды хору Амэрыканскае вайсковае акадэміі для кінастужкі «Мы былі салдатамі».

Падзеі, якім прысьвечаная песьня

У адным з баёў у Францыі Чарлз Макензі атрымаў раненьне ў плячо. Пасьля гэтага яго выправілі на лячэньне назад у Шатляндыю, дзе хірург зьбіраўся ампутаваць яму руку. Аднак сяржант Макензі адмовіўся ад апэрацыі, каб вярнуцца ў склад свайго падразьдзяленьня. Перад выпіскаю ён зрабіў здымак на ганку шпіталя.

Пазьней Чарлз Макензі загінуў у штыкавым баі, баронячы ў акопе параненага саслужыўца. Пабачыўшы ў той дзень, як ягоны фатаздымак зваліўся з-па-над каміну, ягоная жонка сказала дачцэ, што Чарлз памёр.

Тэкст і пераклад

Першы куплет выконваецца двойчы напачатку ды прыканцы сьпеву.

па-шатляндзку	па-беларуску
Lay me doon In the caul caul groon, Whaur afore Monie mair huv gaun.	Пакладзіце мяне Ў сырую зямлю, Куды да мяне Многія іншыя сышлі.
When they come A wull staun ma groon Staun ma groon, Al nae be afraid.	Калі яны прыйдуць, Я бараніцьму сваю зямлю. Баронячы зямлю, Я не збаюся.
Thoughts awe hame Tak awa ma fear. Sweat an bluid Hide ma veil awe tears.	Думы пра дом Забіраюць мой страх. Пот ды кроў Хаваюць мой вэлюм сьлёз.
Ains a year Say a prayer faur me! Close yir een An remember me!	Аднойчы на год Маліся за мяне! Заплюшчы свае вочы Ды ўзгадай мяне!
Nair mair Shall a see the sun, For a fell Tae a Germans gun.	Ніколі больш Ня бачыць мне сонца, Бо я загінуў Ад зброі немцаў.