Казімер Аляксандар Пацей
Казімер Аляксандар Пацей (14 траўня 1666 — 10 чэрвеня 1728) — дзяржаўны і вайсковы дзяяч Вялікага Княства Літоўскага. Кашталян віцебскі (1700—1703) і троцкі (1703—1705), ваявода віцебскі (з 1705).
.jpg) Казімер Аляксандар Пацей | |
 Герб «Вага» | |
| Асабістыя зьвесткі | |
|---|---|
| Нарадзіўся | 14 траўня 1666 |
| Памёр | 10 чэрвеня 1728 |
| Род | Пацеі |
| Бацькі | Леанард Габрыель Пацей Рэгіна з Агінскіх |
| Жонка | Ганна Тэрэза зь Летаваў Францішка з Халецкіх |
| Дзеці | Антоні, Аляксандар, Міхал, Барбара, Тэрэза |
Быў старостам рагачоўскім, сураскім і жыжмарскім.
Біяграфія рэдагаваць
Прадстаўнік шляхецкага роду Пацеяў гербу «Вага», сын Леанарда Габрыеля, ваяводы віцебскага, і Рэгіны з Агінскіх. Меў брата Людвіка Канстантына, гетмана вялікага.
У 1692 годзе атрымаў урад харунжага троцкага. За часамі Грамадзянскай вайны ў Вялікім Княстве Літоўскім 1700 году падтрымліваў рэспубліканцаў — супраціўнікаў Сапегаў. Браў удзел у канфэдэрацыі войска Вялікага Княства Літоўскага 1696 году супраць Сапегаў, у бітве пад Алькенікамі. У студзені 1701 году на чале шляхецкага рушаньня разьбіў 16 конных харугваў Сапегаў і аддзелы сялянаў, ўзброеныя Сапегамі.
Выступаў за абсалютную ўладу караля і вялікага князя Аўгуста Моцнага. Удзельнічаў у Сандамірскай канфэдэрацыі, быў прыхільнікам Маскоўскай дзяржавы ў барацьбе супраць швэдзкага караля Карла XII. У 1708 годзе часова перайшоў на бок караля і вялікага князя Станіслава Ляшчынскага, у 1709 годзе зноў далучыўся да Аўгуста Моцнага[1].
Першы раз ажаніўся каля 1707 году з Тэрэзай Ганнай Летаў (памерла па 1712 годзе), другі — з Францішкай Халецкай. У шлюбе нарадзіліся дзеці:
- Антоні (?—1749), стражнік вялікі літоўскі;
- Аляксандар (?—1770), ваявода троцкі;
- Міхал (?—1787), староста рагачоўскі і жыжмарскі;
- Барбара, жонка пісара вялікага літоўскага Юзэфа Бжастоўскага;
- Тэрэза, жонка стольніка кароннага Ігнацыя Гумецкага.
Крыніцы рэдагаваць
- ^ Грыцкевіч А. Пацеі // ВКЛ. Энцыкл. — Мн.: 2005 Т. 2. С. 420.
Літаратура рэдагаваць
- Вялікае княства Літоўскае: Энцыклапедыя. У 3 т. / рэд. Г. П. Пашкоў і інш. — Мн.: Беларуская Энцыклапедыя, 2005. — Т. 2: Кадэцкі корпус — Яцкевіч. — 788 с. — ISBN 985-11-0378-0