Технология

«Технология» (Тэхналёгія) — сынт-поп-гурт з Масквы. Пік папулярнасьці прыпаў на 1991—1993 гг. У розных складах існуе з 1990 году да гэтага часу. Для стварэньня музыкі гурт выкарыстоўвае электронныя інструмэнты — сынтэзатары, сэмплеры і сучасныя кампутарныя тэхналёгіі. «Тэхналёгія» заснаваная ўдзельнікамі гурту «Біяканструктар» Леанідам Велічкоўскім, Андрээм Кахаевым і Раманам Рабцавым. Імідж і гучаньне гурту давалі нагоду для параўнаньня з брытанскім калектывам «Depeche Mode».

Технология
Група Технология, 2009 год
Інфармацыя
Гады	1990-сёньня
Адкуль	Масква
Мова	расейская
Жанр(ы)	сынці-поп
Выдавец	ГАЛА-РЕКОРДЗ
Удзельнікі	* Уладзімер Нечытайла Раман Рабцаў Мацьвей Юдаў
http://www.tehnologia.info/

Гісторыя

У 1990 годзе гурт займаецца запісам дэманстрацыйнага матэрыялу, здымае малабюджэтныя відэакліпы на чатыры песьні. У якасьці вакаліста ў гурт быў запрошаны Уладзімер Нечытайла, які працаваў да гэтага з гуртом «Биоконструктор» у якасьці тэхніка. У 1991 годзе быў запісаны дэбютны альбом «Усё, што ты хочаш», ён выходзіць на аўдыёкасэтах і вініле. Група здымае відэакліпы на песьні «Націсьні на кнопку» і «Дзіўныя танцы». З красавіка таго ж году гурт пачынае супрацоўнічаць зь вядомым прадусарам Юрыем Айзэншпісам. У 1992 годзе гурт, пасьля музычнага фэстывалю ў Таліне, выпускае альбом рэміксаў «Мне не патрэбная інфармацыя» і пачынае запіс свайго новага поўнафарматнага альбому «Рана ці позна». Увосень 1992 году «Тэхналёгія» спыняе сваё супрацоўніцтва з Айзэншпісам. Леанід Велічкоўскі сыходзіць з канцэртнага складу, на яго месца прыходзіць Валерый Васько, таксама былы ўдзельнік гурта «Биоконструктор». У 1993 годзе Раман Рабцаў атрымлівае кантракт з кампаніяй Radio France Internationale і зьяжджае ў Францыю запісваць сольны альбом, а ў верасьні 1993 году аб’яўляе пра свой сыход. Празь некалькі месяцаў гурт пакідае і Андрэй Кахаеў.

У 1996 годзе гурт зьяўляецца ў абноўленым складзе: Уладзімер Нечытайла і Леанід Велічкоўскі запісалі альбом «Гэта вайна». Максім Велічкоўскі (клявішныя), Віктар Бурко (клявішныя, бэк-вакал) і Кірыл Міхайлаў (барабаны) акампануе Уладзімеру Нечытайлу падчас канцэртаў.

У 2003 годзе адбываецца ўзьяднаньне двох асноўных вакалістаў гурту, Рамана Рабцава і Уладзіміра Нечытайлы. Да гурту далучаюцца два маладыя музыкі Раман Лямцаў (сынтэзатары, вакал), Аляксей Савосьцін (сынтэзатары, кампутар) — удзельнікі гурту «Модуль». Адначасова з гэтым, кампанія гуказапісу «Джэм» перавыдала 4 афіцыйныя альбомы музыкаў у новым афармленьні, з бонус-трэкамі і адмайстараваным гучаньнем.

У красавіку 2005 году ў складзе гурту адбыліся некаторыя зьмены: Раман Лямцаў пакінуў гурт і вырашыў засяродзіць свае намаганьні на гурце «Модуль», які падпісаў кантракт з прадусарам Сяргеем Піменавым, былым удзельнікам гурту «ППК». На месца Рамана Лямцава быў запрошаны новы музыка — Мацьвей Юдаў (babyMax), які да гэтага моманту амаль год працаваў з «Тэхналёгіяй» у якасьці гукарэжысэра і адначасова быў музыкам у складзе «Модулю». Напрыканцы 2005 году ў «Тэхналёгію» вяртаецца адзін зь яе заснавальнікаў — барабаншчык Андрэй Кахаеў. У сакавіку 2006 году гурт выпускае самотнік «Дайце вагню» — c кавэр-вэрсіяй песьні гурту «Альянс». 17 чэрвеня 2006 году ў СДК МАІ група ладзіць прэзэнтацыю новай канцэртнай праграмы «Немагчымыя сувязі» напярэдадні выпуску новага альбому. Гурт «Тэхналёгія» выступаў сумесна з Camouflage падчас іхных гастроляў у Расеі ў сьнежні 2006 году.

4 красавіка 2007 г. адбылася прэм’ера фільму «Адно каханьне на мільён», для здымак у якім «Тэхналёгія» сабралася ў сваім першапачатковым складзе і выйшла на сцэну, каб зьняцца ў ролі саміх сябе ўзору 1993 году. У красавіку 2009 году група выпускае самотнік «Цудоўны новы сьвет», а таксама яго ангельскамоўную вэрсію «Brave New World», запісаную сумесна з вакалістам швэдзкага гурту Elegant Machinery Робэртам Энфарсэнам. 22 траўня 2009 году ў пецярбурскім клюбе «Орландина» адбылася прэзэнтацыя новага альбому, які атрымаў назву «Носьбіт ідэяў». У жніўні 2009 году гурт абмежаваным накладам выпускае EP «Латэкс» — кружэлку, у якую ўвайшлі некалькі арыгінальных вэрсіяў (сярод іх джазавы варыянт у выкананьні Р. Рабцава) загалоўнай песьні, арыгінал якой выйшаў на альбоме «Носьбіт ідэяў», пара інструмэнтальных кампазыцыяў і дзьве не выдаваныя раней песьні.

Выступ на Ілімпіядзе ў Каражме, Архангельская вобласьць, Расея, 2011 год

У 2010 годзе «Тэхналёгія» працягвае актыўна выступаць у Расеі, прымаючы ўдзел на рок-фэсьце «Завея» ў Новакузьнецку на адной пляцоўцы з «The Matrixx» Глеба Самойлава, «Сэнсавымі галюцынацыямі» і мясцовымі выканаўцамі, а таксама выступаючы на ​​разагрэве перад канцэртам праекту Алана Ўайлдара «Recoil» у Екацерынбургу. У тым жа годзе ўдзельнікі калектыву прымаюць удзел у здымках мастацкага фільму «Здаецца нядорага», згуляўшы ў адным зь 7 эпізодаў сакрэтных агентаў, што высочваюць маньякаў і тэрарыстаў пад прыкрыцьцём музычнае дзейнасьці «Тэхналёгіі». Прэм’ера фільму адбылася ў траўні 2010 году, а ўвесну 2011-га яго можна было ўбачыць у Інтэрнэце. Адмыслова для фільму была напісаная песьня «Ў інтарэсах сьледзтва», канцэртнае выкананьне якой у клюбе «Пастаяннае месца жыхарства» ўвайшло ў фільм.

У 2010—2011 гг. гурт удзельнічае ў праектах каналу НТВ — «Супэрстар», прысьвечаны Ю. Айзэншпісу, і «Музычны рынг НТВ». У лютым 2011 году ў гурце ў чарговы раз адбываюцца зьмены складу: клявішнік і аранжыроўшчык Аляксей Савосьцін і барабаншчык Андрэй Кахаеў — удзельнік першапачатковага складу — пакідаюць гурт. А. Савосьцін засяродзіўся на сваіх праектах «Модуль» і «Unisex», у якіх ёсьць клявішнікам і адным з аўтараў песень. У чэрвені 2011 году гурт «Тэхналёгія» выпускае новы дыск, прысьвечаны 50-годзьдзю палёту чалавека ў космас, «Начальнік Сусьвету», на якім прысутнічае загалоўны самотнік, яго рэміксы, а таксама некалькі інструмэнтальных кампазыцыяў. Выпуск новага дыску адзначаны канцэртам 3 чэрвеня ў маскоўскім клюбе Story.