Сабор Сьвятога Мікалая (Бабруйск)

Сьвята-Мікольскі сабор - праваслаўная царква ў Бабруйску, катэдральны сабор Бабруйскае й Быхаўскае япархіі.

Гісторыя

Першыя ўзгадкі пра царкву тычацца XVI ст. Неўзабаве пасьля падпісаньня ў 1596 Берасьцейскае вуніі царква стала ўніяцкай, якой заставалася да Другога падзелу Рэчы Паспалітай, калі ў 1795 расейскімі ўладамі яна была зноў пераробленая пад праваслаўную.

Да 1812 царква знаходзілася каля ракі Бярэзіна. Але ў сувязі з будаўніцтвам Бабруйскае фартэцыі царква была перанесеная на Парыцкі фарштат, адкуль у 1829 яе перанесьлі на Менскі фарштат. У 1835 быў узьведзены новы драўляны будынак царквы. На месцы ж першапачатковага знаходжаньня царквы была пабудаваная Рагачоўская брама фартэцыі.

У 1879 да прыходу царквы належылі жыхары Бабруйску з фарштатамі й хутарамі, вёскі Арновічы, Пісчакі, Канчані, Думаноўшчына, Ясны Лес, Вялічкава, Даманава. Агульная колкасьць прыхажанаў была 2069 мужчыны й 2055 жанчын. Протоярэем царквы быў Фёдар Смоліч, дапаможным сьвятаром быў Іосіф Яхімовіч. Пры царкве была прыходзкая вучэльня з жаночай зьменай.

У 1892-1894 быў пабудаваны новы касенны будынак царквы. Да царквы належылі: Сьвята-Георгіўская царква (Думаноўшчына), Сьвята-Мікалаеўская царква (хутар Лукі), збудаваная ў 1826; Сафійская царква, Сьвята-Духаўская царква (1901) , капліцы ў вёсцы Ясны Лес.

За савецкім часам царква была зачыненая, але аднавіла сваю дзейнасьць падчас ВАВ. На прылеглай да цэрквы тэрыторыі былі зробленыя нямецкія могілкі. У 1964 царква была зачыненая, а ейны будынак быў перароблены пад басэйн. 1 жніўня 2003 увесь будынак царквы перадалі вернікам. Адначасова пачалося яе аднаўленьне.

Сучасны стан

У царкве два прастолы: першы асьвячоны ярэйскім чынам у 2001, 2-і у 2007 архірэйскім чынам. Пры царкве маюцца нядзельная школа, сястрыцтва, казацтва, бібліятэка. Клірыкі - плябан протаярэй Аляксандар Палуянаў, ярэй Міхаіл Пракоф'еў, ярэй Аляксей Болатаў, ярэй Віктар Смычнік , дыякан Міхаіл Ярмаловіч.

Вонкавыя спасылкі

• Інфармацыя на сайце япархіі