Вуглавая хуткасьць

Вуглава́я ху́ткасьць — фізычная велічыня, што характарызуе, наколькі хутка зьмяняецца вугал павароту цела пры ягоным вярчэньні. Кажучы больш фармальна, вуглавая хуткасьць — гэта вытворная ад вугла павароту па часе:

$\omega ={\frac {d\Phi }{dt}}$

Пры павароце пункту, што рухаецца па акружыне з радыюсам R, на вугал $d\Phi$ яго перамяшчэньне складае

$dr=Rd\Phi$

Адсюль вынікае сувязь паміж вуглавой і лінейнай хуткасьцю матэрыяльнага пункту:

$v={\frac {dr}{dt}}=R{\frac {d\Phi }{dt}}=\omega R$

Такім чынам, пры вярчальным руху кожны пункт цела мае сваю хуткасьць, якая залежыць ад яго адлегласьці R ад воcі вярчэньня. У той жа час, вуглавая хуткасьць усіх пунктаў (для абсалютна цьвёрдага цела) аднолькавая.

Вуглавая хуткасьць можа разглядацца як вэктар, які накіраваны ўздоўж восі вярчэньня так, што калі глядзець у кірунку вэктара, то вярчэньне адбываецца паводле гадзіннай стрэлкі. Вэктар вуглавой хуткасьці належыць да псэўдавэктараў.

Вэктар вуглавой хуткасьці можна вызначыць наступным чынам:

$\mathbf {\omega } ={\frac {\mathbf {r} \times \mathbf {v} }{r^{2}}}$

дзе $\mathbf {r}$ — вэктар радыюсу, накіраваны ад цэнтру акружыны да матэрыяльнага пункту.

Модуль вуглавой хуткасьці вымяраюць радыянамі за сэкунду.